These Brutal Honest Lines About IT Employees Will Hit Every Struggling Youngster

Contributed By Nag Writes

ఎక్కడ నీ చిరునామా ఓ ఐటీ కుర్రోడా | ఇంకెందాక నీ పయనం ఓ హైటెక్ కుర్రోడా

అత్తరు పూసుకుని సక్కగ ముస్తాబయినావు | బిత్తరు సూపులతో ఆయాసపడతావు | సత్తా చాటుకుంటూ సాగరాలు దాటుతావు | పత్తా లేకుండా ఉరుకుతావు ఊగుతావు

హడావుడిగ సందుల గొందుల్లో రయ్యిమంటూ దూసుకెళ్లు బుల్లెట్ కుర్రోడా | ఆడాఈడా కస్సుబుస్సు మనుకుంటు కయ్యాలు పెట్టుకుంటూ బుసలుకొట్టు కుర్రోడా | వడివడిగా తడబడతు కయ్యికయ్యిమనుకుంటు కోపాల కుర్రోడా | కుడిఎడమల తికమకతో నీతీ నియమాలు లేని కక్కుర్తి హైటెక్ సన్నాసి

రోడ్డెక్కితె రోదన అంతులేని వేదన | బండెనక బండి కట్టి బారులుతీరి | నడిరోడ్డున దిక్కులేని నరకయాతన | గడిపేవు గంటలు గంటలు వృథా వృథా

కూర్చుంటే లేవలేవు తీరిగ్గా తినలేవు | చర్చలు ఎన్నెన్నో తిన్నదేమో అరగదు అరిగింది అలిగి బుంగమూతి పెడుతుంది | కూర్చునే మరి సల్లని గదిలో కష్టపడుతు ఆరోగ్యం అటకెక్కితె | ఖర్చులుపెట్టి మరీ బరువులెత్తి వంగివంగి గెంతులేసేవు

అంతులేని ఆవేదన దాచుకుని లోలోన మరి నవ్వేవు పైపైన | క్షణమానందం క్షణమావేశం | క్షణికావేశపు నిర్ణయాలు క్షణక్షణ ఘర్షణలు | అలుపెరుగని అంతర్మథనం గమ్యమెరుగని పయనం | తీరానికి చేరేదెపుడో నీకైనా తెలుసా ఓ ఐటీ కుర్రోడా

చిన్ననాటి స్నేహాలు గుర్తొస్తే కన్నీళ్లు తుడుచుకుంటావు | ఆనాటి అనుబందాలు అలనాటి ఆప్యాయతలు తలచుకుని కుమిలేవు | అమ్మానాన్నల అక్కచెల్లెళ్ల ప్రేమ దూరమయ్యి రోదించేవు | మట్టివాసన మరిచావు పచ్చని ప్రకృతికి దూరమయ్యి సొంతూరుని మరిచావు ఓ ఐటీ కుర్రోడా

ఎక్కడ నీ చిరునామా ఓ ఐటీ కుర్రోడా... ఇంకెందాక నీ పయనం ఓ హైటెక్ కుర్రోడా..